Germaniyädä mäçetkä svastikalı xat cibärgännär

Germaniyäneñ Göttingen şähärendä Diniyä êşläre törek islam berlegenä bäyle mäçetkä östenä svastika töşerelgän häm rasaçıl yanaw yazılğan xat cibärelde. Ğıybadätxanä idaräse älege waqıyğa nisbätennän tiyeşle organnarğa şikayät’ beldergän.

Mäçetneñ sośial’ media akkauntındağı belderüdä bolay diyelä: “Mäçetebez häm Göttingenda yäşäwçe möselmannar, qızğanıçqa, qabat sulçı rasaçılarnıñ yanaw häm mısqıllawına duçar buldı. Kem ikäne bilgesez keşe yäisä keşelärneñ mäçetebez adresına cibärgän xatında yanawçı cömlälär, mısqıllaw häm faşist simvolı bar. İdarä şurası isemennän cämäğat’çelegebezne tınıçlıq saqlarğa çaqırabız. Wäqalätlelär bularaq cämäğatebezneñ iminlektä mäçetebezgä kilä aluı öçen barlıq mömkinleklärne qarap çığaçaqbız”.

Älege mäçetkä 22nçe sentyabr’dä dä oxşaş höcüm bulğan ide. Ul waqıtta ğıybadätxanä binasınıñ tışqı yağına svastika sızdılar. Waqıyğanı tikşerü êşe bara.