NATOnıñ kiläse sammitı Litvada uzaçaq

NATOnıñ kiläse iñ yuğarı däräcäle sammitı 2023nçe yılnıñ 11nçe-12nçe iyülendä Litvanıñ başqalası Vil’nyusta uzaçaq. Bu xaqta ittifaqnıñ ğomum särqatibe Yens Stoltenberg citkerde.

NATO citäkçese üzeneñ belderüendä oyışmanıñ salqın suğıştan birle iñ butalçıq häm aldan farazlanmas iminlek moxite belän oçraşuın äytä. Ul Vil’nyustağı cıyılışnıñ NATO däwlätläreneñ liderları öçen saqlanu häm höcümne kire qağunı köçäytäçäk yaña adımnar yasawğa forsat biräçägen, xärbi çığımnarnıñ artuı, monnan tış, Ukrainağa yärdämne däwam itü mäs’äläläre qaralaçağın belderde.  

Stoltenberg Tön’yaq Amerika belän Awrupa arasındağı transatlantik bağ’lanışnıñ NATO däwlätlärendä yäşäwçe 1 milliard keşeneñ qurqınıçsızlığı öçen ähämiyätle buluın assızıqladı.

NATOnıñ däwlät häm xökümät başlıqları däräcäsendäge soñğı sammitı 28nçe -30nçı iyün’ könnärendä İspaniya başqalası Madridta uzğan ide.