İranda rizasızlıq çaralarında ülüçelär sanı 304 buldı

İranda Mäxsa Äminineñ qulğa alınğaç ülüennän soñ başlanğan rizasızlıq çaralarında iminlek köçlärneñ qarşılıq kürsätüe näticäsendä ğomere özelüçelärneñ sanı 304kä citte.  

Norvegiyädä urnaşqan İran keşe xoquqları oyışmasınıñ internet säxifäsendä çıqqan xisapta ildä 50 könnän artıq däwam itüçe protestlar belän bäyle mäğ’lümat birelde. Anda İrannıñ 31 töbägeneñ 22sendäge sannar kiterelä. İñ küp ülemnär çirät buyınça Sistan-Beluçistan (118), Mazenderan (33), Tähran (30), Kördestan (26) häm Gilan (22) töbäklärendä terkälgän.

Xisapta äytelgänçä, ülgän protestçılarnıñ 41e 18 yäş’tän keçe, 24e isä xatın-qız.

İran keşe xoquqları aktivistları agentlığı xäbärenä qarağanda, Äminineñ ülemennän soñ başlanğan çaralarda älegä qadär 38 iminlek xezmätkäreneñ dä ğomere özelgän.

Tähranda 13nçe sentyabr’dä “äxlaq poliśiyäse” bularaq bilgele İrşad patrule qulğa alğannan soñ xäle awırayıp xastaxanägä salınğan 22 yäş’lek Mäxsa Ämini 16nçı sentyabr’dä wafat buldı. Bu xäl il idaräsenä qarşı protestlar kiterep çığardı. İranda däwam itüçe rizasızlıq çaralarında 10 meñnän artıq keşeneñ saq astına alınuı alğa sörelä.