Papa Franŝisk tınıçlıqqa çaqırdı
Papa taraflar arasında citdi söyläşülärne başlatırğa çaqıru yasadı
Katoliklarnıñ ruxi liderı häm Vatikan däwlät başlığı Papa Franŝisk Ukrainada däwam itüçe suğışnı beterergä häm taraflar arasında citdi söyläşülärne başlatırğa çaqırdı.
Papa Franŝisk Baxreynda oyıştırılğan “Baxreyn dialog forumı: Keşelärneñ bergä yäşäwe öçen Könçığış häm Könbatış” isemle cıyılışnıñ yomğaqlaw utırışında çığış yasadı.
Rusiyäneñ Ukrainağa höcümen, dön’yanı qaqşatqan bäreleşlärne, qorallar häm atom-töş qoral qullanu yanawın qabat tänqıyt’lägän Papa tübändägeçä citkerde: “Kürüebezçä, tragedik sŝenariy barlıqqa kilä. Keşelärne berençe urınğa quyu häm ähämiyät kürsätü urınına küz yäşe häm ülemgä säbäpçe bulğan raketalar, qorallar belän uynıybız. Ukrainada däwam itüçe suğışnı beterergä häm taraflar arasında citdi söyläşülärne başlatırğa çaqırabız,” – dide.
Papa Franŝisk inanuçılarnıñ suğışqa “yuq” diyüen häm dinnärneñ tınıçlıq yulın kürsätü zarurlığın äytte.