Ukraina belän Rusiyä arasında äsir almaşu

Rusiyä häm Ukraina arasında 24nçe fevral’dän birle baruçı suğışta äsirlekkä töşkän ğaskärilärne almaşu buldı.

Rusiyä saqlanu ministrlığınnan belderülärençä, Ukraina yağı belän söyläşülär näticäsendä 107 rus xärbiye irekkä cibärelgän. Alarğa kiräkle mediśina häm psixologik yärdäm täêmin itelüe äytelä. Xärbilär ministrlıqnıñ oçqıçları belän başqala Mäskäwgä kitereläçäk.  

Ukraina ilbaşı apparatı citälçese Andrey Yermak isä Telegramnan yasalğan belderüendä äsirlär almaşu näticäsendä, şulay uq, 107 ukrain ğaskäriyeneñ irekkä cibärelüen, alarnıñ 74eneñ Azovstal’ êşxanäsendä suğışuçılar buluın citkerde.  

“Suğışta yaralanuçılarnıñ kübesen öygä qaytardıq. Bigräk tä, Mariupol’ häm Azovstal’da awır yaralanıp ayaqqa basa almaslıq xälgä kilüçelärne almaşuğa ireştek. Aralarında Yelenovskaya koloniyäsendä bulğan şartlawda yaralanğan ber ğaskäriebez bar,”-dide Yermak.

Rusiyä belän Ukraina arasında monnan aldağı äsir almaşu 29nçı oktyabr’dä ütkän ide. Anda 52 ukrainalı häm 50 rus xärbi irekkä cibärelde.