AQŞ Qoyaşnı qarañğılaytu yulların êzli

AQŞ klimat krizisınıñ täêsiren ciñeläytü maqsatınnan Qoyaşnı qarañğılaytu yulların êzli.

Amerika matbuğatındağı xäbärlärgä qarağanda, Aq Yortnıñ fän häm texnologiyä säyäsäte xezmäte bu nisbättän 5 yıllıq tikşerenü proyektın koordinaśiyäläyäçäk. Anıñ nigezendä atmosferadağı parnik gazları säbäpçe bulğan cılınunı kimetü öçen Cirgä kilep citüçe qoyaş nurları külämen üzgärtü fikere yata. Planda nurlarnı Qoyaşqa kire cibärü öçen atmosferağa kisäkçeklär çäçü häm monıñ Cir öçen mömkin bulğan näticälären küzätü.

Bu ısul hawa apparatları belän atmosferanıñ stratosfera qatlawına törle gaz häm kisäkçeklärdän toruçı neçkä toman cibärüdän ğıybarät. Qayber fän ähelläre monıñ näticäsendä qoyaş nurlarınıñ ber öleşeneñ ğalämgä kire çağılacağın häm planetanıñ suınaçağın uylıy. Tik mondıy sśenariyda nindi gaz häm kisäkçeklär qullanılırğa tiyeşlege xaqında yıllar buyı bäxäsläşälär.

Klimat texnologiyälärenä östenlek birüçe investiśiyä fondı  “Lowercarbon Capital”ğa nigez saluçı Kris Sakka Aq Yortnıñ bu adımına uñay qarawçılarnın berse. “Bu ısul milliardlağan keşeneñ kerem çığanağın saqlaw mömkinlegenä iyä,”-dide ul.    

Şulay da şaqtıy ğalim bu fikergä şöbhälänep qarıy. Karnegi klimat belän idarä itü iniśiativasınıñ citäkçese Yanoş Paştor bolay di: “Başta ber däwlätneñ gaz bülep çığarunı kimetü öçen ni êşläwenä qararğa kiräk. Aña qaramıyça başqa adımnarnı qararğa kiräkmi. Qoyaş nurlanışın üzgärtü berqayçan da klimat krizisına çişeleş bula almayaçaq”.