İran: “Bez Ukraina belän söyläşügä äzer”
İran, Rusiyäneñ Ukrainada Tährandä êşläp çığarılğan kamikadze keşesez qorallı hawa apparatların qullanuı turındağı raslawlarnı tağın ber qat kire qağıp, bu gäyıpläwlärneñ beterelüe öçen Ukraina belän söyläşügä äzer buluın belderde
İrannıñ “IRNA” räsmi xäbär agentlığına kürä, Tışqı êşlär ministrlığı süzçese Nasır Känani Ukrainadağı suğışta qullanıluı öçen Tährannan pilotsız oçu apparatları belän bergä Rusiyägä qoral cibärelüe turındağı raslawlarğa reakśiyäsen täqrarladı.
Telgä alınğan şuşı raslawlarnıñ säyäsi maqsatlardan çığıp İranğa qarşı illärneñ mediaları tarafınnan uylap çığarıluına basım yasawçı Känani: "Şuşı gäyıpläwlärne beterü öçen bez Ukraina belän söyläşügä äzer”, - dip äytte.
Tähran citäkçelegeneñ moña qadär dä bäreleşlärgä häm suğışqa qarşı buluın bäyan itüen xäterlätüçe Känani İrannıñ xalıqara xoquqqa kürä illärneñ cir bötenlegen yaqlawın iskärtep uzdı.
Amerika Quşma Ştatları däwlät departamentı süzçese Vedant Patel kiçäge matbuğat oçraşuında, İran dron sistemalarınıñ Ukrainada Rusiyä tarafınnan xärbi häm grajdan (sivil) tämeklärgä (ob’yektlarğa) qarşı qullanıluın belderep:
"Rusiyä operatorları bu sistemalarnı qullanunı öyränü öçen İranğa kittelär. Bu sistemalarnıñ xärbi häm grajdan (sivil) tämeklärgä (ob’yektlarğa) qarşı qullanıluı turında bik kiñ qolaçlı dälillär bar. AQŞ gäyplelärgä qarşı sankśiya qullanudan yäki çaralar kürüdän ikelänep tormayaçaq”, - dip iskärtep uzğan ide.
Bäyläneşle xäbärlär
Sloveniya Fälästinne tanıdı
Kiçä parlament utırışında küpçelek deputatlar älege täq’dimne yaqlap tawış birde
