“Ukrainadağı suğış äle ozaq däwam itäçäk”

Avstriyä tışqı êşlär ministrı Aleksandr Şallenberg Rusiyä däwlät başlığı Vladimir Putinnıñ soñğı belderülären Ukrainadağı bäreleşneñ tiränäyüenä kiteräçägen, şul säbäple suğışnıñ ozaq däwam itäçägen söyläde. Räsmi zat BMOnıñ ğomum şurasında qatnaşu öçen N’yu-Yorkka kitkän cirendä matbuğat ähelläre belän aralaştı.

Şallenberg Putinnıñ “öleşçä xärbi mobilizaśiya” iğ’lanınıñ Mäskäw idaräseneñ söyläşülär östälenä utırırğa äzer bulmawın açıq kürsätüen äytte. “Ukrainadağı suğış äle ozaq däwam itäçäk”- dide ul.  

Ministr fikerençä, Putin möräcäğaten BMO ğomum şurası uzğan waqıtqa maxsus turı kiterde - şulay itep ul tağın da kübräk psixologik basım tudırırğa maqsat itep quydı.

Şallenberg Rusiyäneñ Ukrainanıñ könçığışın annekśiyäläw iniśiativasınıñ berqayçan da qabul itelmäyäçägen belderde. Ul yaqlarnı çişeleş öçen niçek bulsa da söyläşülär östälenä kire qaytarırğa kiräklegen, suğış qırında bernindi çişeleş bulmayaçağın alğa sörä.  

İsegezgä töşeräbez, Rusiyä däwlät başlığı Putin 21nçe sentyabr’dä Ukrainadağı suğış öçen öleşçä mobilizaśiyä turındağı qararnı imzalawın citkerde häm Rusiyäneñ çiklärenä yanaw bulğanda barlıq yullarnı qullanaçaqların äytte.