Patşabikä belän xuşlaşuğa 3 däwlät çaqırılmadı

Angliyä patşabikäse Êlizabet İkençeneñ 19nçı sentyabr’dä uzaçaq cenaza cıyınına Rusiyä, Belarus’ häm M’yanma çaqırılmağan. İrannıñ isä ilçesenä genä çaqıru cibärelgän. Çarada dön’yanıñ här poçmağınnan yaqınça 500 yuğarı däräcäle wäqalätle qatnaşuı kötelä.  

Politico internet säxifäseneñ xäbärenä qarağanda, cenaza cıyınınıñ räsmi protokolı niçek uzaçağı turında belderü Angliyädäge ilçeleklärgä cibärelgän. Anda Vestminster abbatlığı çirkäwendäge çarada keşeneñ çiktän tış küp bulacağı, däwlät, xökümät başlıqlarına barı üzlärenä häm yannarında kiläçäk ire yäisä xatını şikelle ber keşegä genä urın bülenäçäge äytelä. Cıyında liderlarnıñ törkemnäre häm ğailälärennän başqa keşelärneñ qatnaşuı mömkin tügellege assızıqlana. Ägär däwlät yäisä xökümät başlığı kilä almasa, cıyında anı ministr şikelle başqa yuğarı däräcäle zat wäkillek itärgä mömkin.  

İsegezgä töşeräbez, Angliyä patşabikäse Êlizabet İkençe 8 sentyabr’ pänceşämbe könne Şotlandiyädä cäyge yalın ütkärä torğan Balmoral qal’gäsendä wafat buldı.  

19nçı sentyabr’dä Londonnıñ Vestminster abbatlığı çirkäwendäge cenaza cıyınınnan soñ patşabikäneñ gäwdäse Angliyä patşa ğailäseneñ daimi rezidenśiyäsennän berse Vindzor qal’gäsendäge İzge Georg käşänäsenä kitereläçäk häm cirläw yolaları da biredä başqarılaçaq.