Awrupa Berlege Rusiyä watandaşlarına viza birüne çikli

Awrupa Berlege Rusiyä watandaşları öçen viza ciñellege kileşüen tuqtatıp tağın da yuğarı bäyäle häm qırıs qağıydälärgä nigezlängän rejim kertergä äzerlänä.  

Awrupa Berlege komissiyäseneñ êçke êşläre öçen cawaplı äğ’zası İl’va Yoxansson bu xaqta matbuğat cıyılışında söyläde. Ul komissiyäneñ kiçä rusiyälelär öçen viza ciñellege kileşüen tulısınça tuqtatu täq’dimen qabul itüen belderde. “Bu tuqtatıp toru Rusiyä watandaşlarınıñ monnan soñ Awrupa Berlegenä östenlekle kerä alu xoquqınnan faydalana almayaçağın añlata. Äytik, kimendä ike tapqır qıybatraq, tağın da qatlawlı viza alu prośessı häm küple säyäxätlär öçen tağın da kübräk çikläwlär belän oçraşaçaqlar,”-dip söyli Yoxansson.

Wäqalätle zat beldergänçä, komissiyä Ukrainanıñ basıp alınğan töbäklärendä birelgän Rusiyä pasportların tanımaw turındağı täq’dimne dä qabul itkän. Qararnı tağın da tiz häm äğ’za däwlätlär arasında koordinaśiyäle qullanılışqa kertü öçen êşçänlek bara.

İl’va Yoxansson maxsus beleşmä äzerlänäçägen häm anda jurnalistlar, oppoziśionerlar, keşe xoquqları aktivistları, ğailä säbäpläre arqasında säfär yasawçılar öçen çığarmalar bilgelänäçägen dä çitkerde.

Awrupağa kerü möräcäğat’läre säbäben beldermiçä kire qağıla ala. Viza rejimı kiläse atnadan üzgäräçäk.

Awrupa Berlege äğ’zaları Pol’şa häm Çexiyä Rusiyäneñ 24nçe fevral’dä Ukrainağa qarşı höcüm başlawınnan soñ uq diyärlek Rusiyä watandaşlarınnan viza möräcäğate qabul itüne tuqtatqan ide.