Atom-töş qorallanu yarışı başlandımı?

BMO atom-töş qorallanu yarışınıñ kire qaytuı turında kisätte. Oyışmanıñ ğomum särqatibe Antonio Guterriş Yaponiyä başqalası Tokioda oyıştırılğan matbuğat cıyılışında xalıqara kiyerenkelekneñ artuı arqasında atom-töş köçenä iyä däwlätlärneñ üzlären agressiv tota başlawların citkerde. Ul älege illärne qoralların qullanğan berençe däwlät bulmasqa häm başqalarğa yanamasqa çaqırdı.

“Minemçä, berkem dä atom-töş suğışı fikeren qabul itmäs. Bu planetanıñ hälakäte bulaçaq. Berkem dä atom-töş qoralın qullanğan berençe yaq bulmasa, atom-töş suğışı da çıqmas,”-dide Antonio Guterriş.

BMO citäkçese Ukrainanıñ iñ zur atom-töş stanśiyäsenä iyä Zaporojye şähären 4nçe avgustta Rusiyä bombalağannan soñ: “Atom-töş stanśiyäsenä yasalaçaq teläsä-qaysı höcüm - üz-üzeñä qul salu,”-dide.

Ğomum särqatib qorallanu yarışında milliardlağan dollarnıñ sarıf itelüenä iğ’tibarnı cälep itte. Ul bu aqçanı klimat üzgärü, yarlılıq belän köräş häm xalıqara cämäğat’çelekneñ ixtiyacların qanäğat’länderü öçen qullanunıñ urınlı bulaçağın äytä.  

Guterriş üzeneñ belderüendä geosäyäsi kiyerenkelek köçäygän häm atom-töş yanawı kön tärtibenä kilgän waqıtta Yaponiyäneñ tınıçlıq mäs’äläsendä köçle häm êzlekle poziśiyäseneñ härwaqıttağıdan tağın da ähämiyätle buluın äytte.

BMO ğomum särqatibe 1945nçe yılnıñ 6nçı avgustında bulğan atom-töş şartlawı qorbannarın iskä alu öçen Yaponiyäneñ Xirosima şähärenä säfär qıldı.