Oçqıçtağı mäyetlärne çığardılar

Greśiyäneñ Kavala şähäre yanında kilep töşkän oçqıçtağı keşelärneñ üle gäwdälären taptılar.

Greśiyä däwlät agentlığı AMNAnıñ xäbärendä äytelgänçä, Ukraina şirkätenä qarawçı Antonov An-12 törendäge oçqıçtağı 8 keşelek êkipajnıñ mäyetläre tikşerülärdän soñ xastaxanägä cibärelgän.

Belgeçlär hälakät urınında aldan farazlanğan xätär matdä tapmadı.

Açıqlanğança, pilot oçqıç motorınıñ bozıluın belderep aşığıç töşep utıru öçen röxsät sorağan. Tik aêroportqa barıp citkänçe motor hawada yana başlıy häm oçqıç toraq punkt yänäşäsenä kilep töşä.

Waqıyğanıñ şahitläre oçqıç kilep töşügä küp sanda şartlaw tawışı işetülären häm yanğın başlanuın söyli. 

Serbiyä saqlanu ministrı Neboyşa Stefanoviç beldergänçä, oçqıç Serbiyäneñ Niş qalasınnan kütärelgän häm Bangladeşqa yul totqan. Anıñ Amman, Êr-Riyad häm Axmedabadqa da kerüe planlaştırılğan. Oçqıçta Bangladeş saqlanu ministrlığı öçen 11 tonna yarım xärbi kiräk-yaraq bula.

Stefanoviç älege şartlatqıç matdälärneñ êksportınıñ qanunlı räweştä başqarıluın, Serbiyä saqlanu ministrlığınnan kiräkle röxsätlärneñ alınuın citkerde.