Dön'ya külämendä açlıq

Dön’yada açlıq qurqınıçı yanawçılarnıñ sanı soñğı 1 yılda 46 millionğa artıp 828 million buldı. BMOnıñ azıq-tölek häm awıl xucalığı oyışması häm Bötendön’ya azıq-tölek programması global’ açlıq xisabın citkerde.  

Anda 2021nçe yılda dön’ya xalqınıñ 10%ınıñ diyärlek açlıq probleması belän oçraşaçağı belderelä. Andıylarnıñ sanı soñğı ber yılda 828 millionğa citte. Ä koronavirus kizüe başlanğannan birle açlıq kiçerüçelärneñ sanı 150 millionğa arttı.

Xisapta “Dön’ya 2030nçı yılğa qadär açlıq, azıq-tölek iminsezlege häm citärlek tuqlanmaw problemalarına noqta quyu maqsatınnan torğan sayın yıraqlaşa” digän yullar bar.

Anda äytelgänçä, 5 yäş’tän keçe yaqınça 45 million bala çiktän tış däräcädä az tuqlana, 149 million balanıñ isä citärlek aşamaw arqasında üseşe totqarlana.  

Xisapta Bötendön’ya azıq-tölek programması mödire Dêvid Beslinıñ fikerlärenä dä urın birelä. “Kiläse aylarda bu sannarnıñ tağın da üsü qurqınıçı bar,”-di ul.

Besli Rusiyäneñ Ukrainada 24nçe fevral’dän birle alıp baruçı suğışınıñ global’ azıq-tölek bäyälären arttıruın, illärne qıtlıqqa taba iltüen äytte.