Boris Djonson wazıyfasınnan kitte

Angliyä xökümäte räise Boris Djonson wazıyfasınnan häm partiyäseneñ liderlığınnan kitüe turında xäbär itte. Başqala Londonda yasağan belderüendä ul: “Yaña xökümät räise wazıyfasına kereşkänçe êşemne däwam itäçäkmen. Wazıyfamnı başqarğanda yanımda bulğan ğailämä, duşlarıma häm ingliz xalqına räxmät belderäm. Bu xökümät räise bulğan çor minem öçen bik ähämiyätle häm öyrätüçe buldı,”-dide.   

Angliyädä kiçä sälamätlek saqlaw ministrı Sajid Javid belän finans ministrı Rişi Sunaq ber-ber artlı wazıyfalarınnan kitülären belderde.

Javid monnan soñ wazıyfasın däwam itüenä vöcdanı irek birmäwe häm Djonsonğa ışanmawı öçen kitüen äytte.

Sälamätlek saqlaw ministrlığınıñ bu qararınnan son küp tä ütmäde finans ministrı Sunaq ta wazıyfasınnan kitüen citkerde.  

Bu ike ministrnıñ älege adımı Djonsonnıñ ber belderüennän soñ yasaldı. Ul Konservativ partiyäneñ deputatı häm törkem idaräçese Kris Pinçernı censi bäylänüdä ğayepläwlären belä torıp aña wazıyfa tapşıruına bik ükenüen äytkän ide. Monnan alda xökümät yortınnan yasalğan belderüdä isä Djonsonnıñ Pinçerğa qarata şiqayät’lärdän xäbärdar bulmawı citkerelde. Soñınnan Djonsonnıñ 2019nçı yılda tışqı êşlär ministrı bularaq êşlägändä Pinçernıñ xilaflıqları turında mäğ’lümat aluı açıqlandı. Näticädä Boris Djonson älege şäxeskä wazıyfa tapşıruı öçen ğafu ütende häm ükenüen äytte.

Bilgele bulğança, xökümät räise koronavirus kizüe çorında kanśelyariyäcendä karantin qağıydälären bozıp kiçälär oyıştıruı öçen dä tänqıyt’ utına totıldı. Berse öçen ul, xätta, ştrafqa da tartıldı. Djonson üz partiyäseneñ qayber deputatları häm oppoziśiyä tarafınnan parlamentqa yalğan söyläwdä ğayeplände.

Üze lider bulğan Konservativ partiyädä 6nçı iyün’dä uzğan ışanıç votumı tawış birüendä ul 148 qarşı häm 211 xuplaw aldı. Işanıç votumın alsa da, Djonsonnıñ säyäsi kiläçägeneñ qurqınıç astında buluı turında söyläşülär yışaydı.