Kanadada Kovid-19 vakśinaların çüpkä taşlıylar

Kanadada 13 million 600 meñ Kovid-19 vakśinasın soñğı qullanu waqıtı betü säbäple çüpkä taşlıylar.

İlneñ sälamätlek saqlaw ministrlığı beldergänçä, 2020 nçe yılda “AstraZeneca” farmaśevtika şirkäte belän 20 million doza Kovid -19 vakśinası satıp alu turında kileşü tözelgän bulğan.

 “AstraZeneca”nıñ koronavirus vakśinaların qadatuçılarda qan quyıru bulğannan soñ başqa şirkätlärneñ vakśinaları qullanıla başlıy häm näticädä 17 million 700 meñ doza vakśina qullanılmıyça qala.

Alarnı başqa illärgä birergä tırışalar, läkin çiklängän taläp häm taratu problemaları arqasında illär vakśinalarnı qabul itmilär.

Sälamätlek saqlaw ministrlığı soñğı qullanu waqıtı betü säbäple 13 million 600 meñ doza vakśinanıñ çüpkä taşlanaçağın beldergän.