Guterreştän Rusiyägä häm Litvağa çaqıru
Berläşkän Millätlär Oyışması Ğomum särkätibe Antonio Guterreş Litvanıñ Rusiyäneñ Kaliningrad töbägenä tovar cibärügä bilgelägän çikläwlär arqasında taraflarnı kiyırenkelekne arttıraçaq nindi dä bulsa ber belderü yäki ğamäldän taypılırğa çaqırdı
BMO Ğomum särkätibe süzçese Stefan Dyujarrik N’yu-Yorktağı BMO Ğomum üzägendä oyıştırılğan matbuğat oçraşuında Guterreşneñ Rusiyä häm Litva arasında Kaliningradqa transport mäs’äläsendä yäşängän kiyırenkelekne “borçılıp küzätüen”, taraflarnıñ bu kiyırenkelekne "dialog yulı belän häm xalıqara xoquqqa yaraşlı bularaq” xäl itüläreneñ zarurlığın belderüen citkerde.
Dyujarrik: "Kiyırenkelekne arttıraçaq kisätülär belän ber rättän böten bu xällärne yaqınnan küzätäbez. Bu citdi borçılu mäs’äläse. Kiyırenkelekne arttıraçaq härtörle açıqlawdan häm ğamäldän dä taypılırğa kiräk”, - dip äytte.
Litva Awrupa Berlegeneñ sankśiyälär isemlegendä bulğan qayber tovarlarnıñ cirläre aşa Kaliningradqa tranzit kiçüen tıyğan, Rusiyä İminlek şurası särkätibe Nikolay Patruşev ileneñ Litva ğamälgä kertkän tıyuğa mömkin bulğan iñ qısqa waqıtta cawap biräçägen beldergän ide.
Rusiyä belän Kaliningrad töbäge arasındağı berdänber timer yulı Litva cirlärennän uza.
Kaliningrad – Rusiyägä ciröste bäyläneşe bulmağan, Litva belän Pol’şa arasında häm Baltıyq diñgeze buyında urnaşqan Rusiyä cirläre.
