Bayden migrant ağımı öçen Putinnı ğayepläde

AQŞ ilbaşı Djo Bayden ilenä möhacir ağımınıñ artuın Rusiyä däwlät başlığı Vladimir Putinnıñ 24nçe fevral’dä Ukrainağa qarşı başlağan suğış arqasında kilep çığuın belderde. Ul Los-Anjeles şähärendä uzğan “Amerika däwlätläre sammitı”nıñ räsmi açılış tantanasında Tön’yaq häm Kön’yaq Amerika illäre liderlarına möräcäğat’ itte.

Bayden üz çığışında demokratiyäneñ kütäreleş öçen iñ ähämiyätle faktor buluın assızıqlap, illär arasındağı xezmättäşlek belän aña teräk bulu kiräklegen äytte.

AQŞ ilbaşı bigräk tä Üzäk häm Kön’yaq Amerika däwlätlärennän möhacir ağımı artuına da qağıldı.

“Dön’yaküläm inflyaśiyä basımnarı Putinnıñ Ukrainağa qarşı başlağan räximsez suğışı belän tağın da naçaraydı. Ğailälärneñ ixtiyacların tabuı tağın da awırlaştı. Barlıq bu faktorlar könbatış yarımşarda migrant ağımına säbäpçe bula,”-dide Bayden.

Ul üz çığışında Amerika qıytğası däwlätläre belän yaña iq’tisadi xezmättäşlek tözelüen häm monıñ üseşkä yärdäm itäçägen belderde.