Suğış küpme jurnalist ğomeren özde?

Rusiyä 24nçe fevral’ könne başlatqan suğışta xäzergä qadär 32 ukrainalı jurnalist yaqtı dön’yadan kitte.

Ukrainanıñ Mädäniyät häm mäğlümat säyäsäte ministrı Aleksandr Tkaçenko bügen ilendä qotlanuçı Jurnalistlar köne uñayınnan yullama yasadı.

Tkaçenko bıyıl ildä Jurnalistlar köneneñ açı uzuın äytep, Rusiyä başlatqan suğışnıñ 32 ukrainalı jurnalistnıñ ğomeren özüen assızıqladı.

Ayıruça soñğı 8 yılda suğışta ülgän ukrainalı jurnalist sanınıñ kübräk buluın açıqlağan Tkaçenko bügenge köndä Ukrainadağı jurnalistlar roleneñ ähämiyätenä iğtibarnı cälep itte.

“Jurnalistlarnıñ cawaplılığı, qıyulığı häm tuğrılığı bik qıymmätle. Mäğlümat frontıbız sezneñ arqada bik köçle,” – dide ministr.