Awrupanıñ möhacirlärgä qarata ikele standartları

Xalıqara Qızılxaç häm Qızılay cämğıyät’läre federaśiyäse citäkçese Françesko Rokka Awrupanıñ ukrainalılar belän dön’yanıñ törle urınnarınnan kilgän möhacirlärgä mönäsäbättä ikele standart kürsätüen belderde.

Ul Rusiyäneñ Ukrainağa qarşı 24nçe fevral’dän birle baruçı höcümnäre säbäple älege ildän kitüçelärne bik tiz qabul itülärenä iğ’tibarnı cälep itä. Rokka monıñ Afrika, Yaqın Könçığış häm başqa urınnardağı dähşättän qaçuçı keşelärneñ xuş qarşılanmawı belän çağıştıra.

“Ukrainanıñ Donbass töbägennän qaçuçı beräw belän Nigeriyadağı Boko Xaram terrorçılarınnan qaçuçı beräw arasında ayırma buluın uylamıym,”-di ul.

Rokka Ukraina krizisınıñ Awrupanıñ migraśiyä säyäsätendä borılış noqtası buluına ömetlänüen, tik xälneñ ber dä üzgäräçägenä oxşamawın äytte. Ul Awrupa Berlegeneñ äle haman möhacirlärgä ayırıp qarawına borçıluın citkerä. Awrupağa baru marşrutı bulğan Urta diñgezdä 2014nçe yıldan birle kimendä 19 meñ keşeneñ ğomere özelde.  

“Êtnik tamırlar häm millät ğomerlärne qotqarğanda xälitkeç faktor bulırğa tiyeş tügel. İkele standartlar bar. Dälile bar. Üz küzebez belän küräbez häm yaqlaw soralğanda kire qağa almıybız,”-dide Françesko Rokka.