"Mutaśiyäne küzätep baru awırlaşa"

Bötendön’ya sälamätlek saqlaw oyışması ğomum mödire Tedros Adxanom Gebreyesus qayber cirleklärdä koronavirus oçraqlarınıñ artuına iğ’tibarnı cälep itte häm virusnıñ niçek mutaśiyälänüen añlawnıñ torğan sayın awırlaşuına borçıluın belderde. Ul oyışmanıñ Jenevadağı üzägendä matbuğat cıyılışında çığış yasadı.

Anda Gebreyesus ber atna tiräse Tön’yaq Koreyada xakimlek itüçe Kovid-19 dulqını xaqında söyläde. “Xalıq vakśinasız bulğan häm küp keşegä awır xastalıq belän ülem qurqınıçı yanawçı ildä koronavirusnıñ nıq taralaçağına borçılabız,”-dide ul.

Gebreyesus Tön’yaq Koreyada sälamätlek saqlaw sistemasınıñ köçsez buluına iğ’tibarnı cälep itte. Ul Bötendön’ya sälamätlek saqlaw oyışmasınıñ ilgä Kovid-19 belän köräş öçen kiräkle mäğ’lümat belän yärdäm itärgä äzer buluın assızıqladı. Ul, monnan tış, oyışma qanatı astındağı 6 regionnıñ 4sendä yoqtıru oçraqlarınıñ artuın belderde.

“Bik küp illär test yasaw häm genom êzleklelegen tikşerü külämen kimette. Şuña kürä virusnıñ niçek mutaśiyälänüen küzätep baru torğan sayın awırlaşa,”-dide belgeç.  

Gebreyesus Jenevada 22nçe mayda başlanaçaq Bötendön’ya sälamätlek saqlaw cıyılışınıñ bik kritik ähämiyätkä iyä buluın da äytte. “Utırışta, kizüdän tış, ğadättän tış xälgä niçek noqta quyu, vakśinalar häm antivirus darulararğa ireşü temaları kütäreläçäk,”-dide ul.