“Ägär yörägegez bar ikän, zinhar, ul portlarnı açığız"
Ukraina portlarında qalğan aşlıqnı êksportlaw öçen Putinğa möräcäğat' ittelär
BMOnıñ Bötendön’ya azıq-tölek programması Ukraina portlarında saqlanuçı aşlıqlarnıñ êksportlanmawınıñ “dön’yadağı azıq-tölek qurqınıçsızlığına qarşı başlanğan suğış” buluın belderde. Portlar açılmasa, qıtlıq häm mäcbüri global’ migraśiyä barlıqqa kiläçäge turında kisätü yasaldı.
Bu problemalarğa iğ’tibar cälep itü öçen BMO ğomum üzägendä uzğan cıyılışta Bötendön’ya azıq-tölek programması mödire Dêvid Bizli Rusiyä däwlät başlığı Vladimir Putinğa möräcäğat’ itte. “Ägär yörägegez bar ikän, zinhar, ul portlarnı açığız,”-dide ul.
BMO ğomum särqatibe Antonio Guterriş isä global’ açlıq däräcäseneñ yaña rekordqa taba baruın häm citdi azıq-tölek probleması belän oçraşuçılarnıñ sonğı ike yılda 135 millionnan 276 millionğa citüen söyläde. Ul 500 meñnän artıq keşeneñ qıtlıq şartlarında yäşäwenä iğ’tibarnı cälep itte. Älege san 2016nçı yıldan birle 500%qa artqan.
Guterriş Ukraina häm Rusiyäneñ dön’yadağı boday häm arpa ixtiyacınıñ öçtän beren qanäğat’länderüen häm könbağış mayınıñ yartısın citeşterüen belderde. Ul Ukraina portlarınnan aşlıq êksportın qabat başlaw öçen Rusiyä, Ukraina, Törkiyä, AQŞ häm Awrupa Berlege belän söyläşülär alıp barıluın äytte.
