Duş alu waqıtı 4 minuttan artmasın
Kaliforniyada sunı saqçıl qullanu öçen qatğıy çaralar kertelä
AQŞnıñ Kaliforniyä ştatında, qorılıq säbäple, yuınuçılardan duş alu waqıtın 4 minut belän çikläw soraldı. Töbäktä iñ küp keşe yäşäwçe Los-Anjelesnıñ mêrı Êrik Garsetti qalanıñ su saqlaw planınıñ 3nçe êtabına küçülären belderde. Bu isä tışta su sibü könnäreneñ sanın 3tän 2gä qaldıru kiräklegen kürsätä.
“Balalarıbız häm onıqlarıbıznıñ krannan ağuçı sunı ışanıçlı qullanuın teläsäk, xäzergä qadär tabılğan çaralarnı ike tapqır arttırıp tormışqa aşıruıbız kiräk,”-dide Garsetti.
Los-Anjeles mêriyäse şähärdä yäşäwçelärdän köndälek su qullanuların kimendä 26 litrğa kimetülären soradı. Moña duş alu waqıtın 4 minut belän çikläp, teş çistartqandä häm qırınğanda krannı yabıp ta ireşergä mömkin.
Bu üzgäreşlärneñ ni öçen kiräklegen añlawğa yärdäm itü öçen sośial’ belem birü kampaniyäse başlanacağı da xäbär itelde. Şulay uq, su qullanunı kontrol’ itü arttırılaçaq.
Los-Anjelesta 1nçe iyün’dä ğamälgä keräçäk mäcbüri programmağa qarağanda, çiräm häm baqçalarğa su sibü atnanıñ barı 2 könendä genä cirle waqıt belän säğat’ 9.00 belän 16.00 arasında mömkin.
