Yuğalğan säyäxät köymäsendägelär üle kileş tabıla

Yaponiyäneñ tön’yaq sularında yuqqa çıqqan turistik säyäxät köymäsendäge keşelärneñ 11e üle kileş tabıldı. Anıñ belän 2 kön êlek Xokkaydoda êlemtä yuğalğannan soñ êzläw-qotqaru êşläre başlanğan ide.

Yar buyı iminlege xezmäte Şiretoko yarımutrawı yar buyında tağın ber gäwdäneñ tabıluın xäbär itkännän soñ ülüçelär sanı 11gä citte.

Ul tirädä su astı tiränlege 100 metrdan da artıp kitüçe çoñğıllar belän tulı. Bu êzläw êşçänlegen awırlaştıra.  

Xokkaydo töbägendä 23nçe aprel’ könne irtän diñgezgä çıqqan 19 tonnalıq säyäxät korabında 2 keşelek êkipaj belän 24 yulçı bula. Alarnıñ 2se bala. 3 säğat’ däwam itärgä tiyeş turnıñ maqsatı – qırğıy tormışnı küzätü.   

Turnı oyıştıruçı şirkät “Şiretoko Yuransen” êlemtä özelgän mizgeldä barlıq yulçılarnıñ qotqaru jiletı kigän buluın beldergän ide. Porttan 27 çaqrım yıraqlıqta Kaşunı şarlawıqları töbägendä köymädän “aşığıç yärdäm” signalı kilä.  

Yaponiyä meteorologiyä agentlığı êlemtä özelgän cirlektä dulqınnarnıñ 3 metrğa citüen, su cılılığınıñ nol’dän 2-4 gradus yuğarı buluın xäbär itte.

Törkiyä älege hälakättän soñ qayğı urtaqlaştı. Tışqı êşlär ministrlığınıñ qayğınamäsendä bolay diyelä: “Hälakättä ğomerläre özelüçelärneñ yaqınnarı häm dus yapon xalqına, xökümätenä täğ’ziyälärebezne belderäbez, yuqqa çığuçılarnıñ tiz arada tabıluın telibez”.