"Bu suğış Awrupa Berlegen häm dön'yanı berläşterde"

Ukraina däwlät başlığı Volodimir Zelenskiy suğışnıñ barı Ukrainanı ğına tügel, böten Awrupa Berlegen berläşterüen belderde.

Ul Awrupa komissiyäse başlığı Ursula fon der Leyen häm Awrupa Berlege tışqı mönäsäbätlär häm iminlek säyäsäte yuğarı wäkile Djosep Borrel’ belän Kiyevtağı söyläşüennän soñ matbuat oçraşuı ütkärde.

“Suğış tulısınça Ukrainanı berläşterde, xalıqnı xökümät belän berläşterde häm şuña kürä Ukraina bu qadär köçle. Bäxetsezlekkä, bu suğış küp sanda qorban kiterde. Häm şuña kürä Ukraina häm ukrainalılarnı saqlaw öçen bu suğış Awrupa Berlegen häm dön’yanı berläşterde,”-dip söyläde Zelenskiy.  

Ukraina ilbaşı Rusiyägä qarşı 5nçe sankśiyälär paketın qabul itü qararı öçen Awrupa komissiyäsenä räxmäten belderde. “Ursula fon der Leyenğa 5nçe sankśiyälär paketı öçen räxmätlemen, tik monıñ citärlek bulmawın uylıym. Alar (ruslar) bezdän küp närsä aldı. Bezdän cirlärebezne dä, keşelärebezne dä aldılar,”-dide ul.

Zelenskiy Awrupanıñ här oçraqta Rusiyägä qarşı, çınnan da, prinśipial’ häm köçle sankśiyälär kertergä mäcbür bulaçağın belderde. “Sankśiyä täq’dimnären daimi räweştä yomşatırğa tırışuçınıñ kem ikänen beläbez häm, nihayät’, awrupadağılarnıñ añlawları öçen här närsäne êşläyäçäkbez. Rusiyäneñ ênergetikasına yäisä rus diñgez navigaśiyäsenä öleşçä çikläwlär tügel, Rusiyägä qarşı çınnan da köçle sankśiyälär kertelüe kiräk,”-dip söyläde Ukraina başlığı.

Zelenskiy bu qararnı kiçekterüçe säyäsätçe häm däwlätlärneñ Rusiyäneñ ukrainalılarğa, Awrupadağı bäysezlekkä qarşı basımı astında fikerlären üzgärtäçäklärenä ışana. Ul, bigräk tä, barlıq Rusiyä bankların global’ finans sistemadan tulısınça çığarırğa çaqırdı.

Zelenskiy belderüendä Kramatorskidağı raketa höcüme turında da süz quzattı. Ul Ukrainadağı tınıç xalıqnıñ ülemenä kitergän bu höcümgä qarata qatğıy dön’yaküläm reakśiyä kötülären assızıqladı.

“Dön’yanıñ barlıq aldınğı däwlätläre Rusiyäneñ Kramatorskidağı höcümen inde ğayepläde. Bu suğış cinayätenä qarata qatğıy häm global’ reakśiyä kötäbez,”-dide Ukraina ilbaşı. Ul bu raketa höcümeneñ başqa küp kenä Rusiyä suğış cinayät’läre şikelle xalıqara mäxkämädäge ğayepläwlärdän berse bulırğa tiyeşlegen dä östäde.