Keniyada bäbäy imezlekläre tıyıla

Könçığış Afrikadağı däwlät Keniyada, bäbäylär kükräk söte belän tuqlansın öçen, imezleklärneñ tıyılaçağı belderelde.  

“The Daily Nation”gazetınıñ xäbärenä qarağanda, Keniya sälamätlek saqlaw ministrlığı ana söte urınına birelüçe tuqlanu matdälären qullanunı kimetü häm beterü maqsatı belän 28nçe maydan başlap şeşäle häm buş imezleklärne tıya. Älege qararnıñ tağın ber säbäbe – imezleklärneñ bik yış çistartılırğa tiyeşlege, alarda küp sanda bakteriyä häm mikroorganizm barlıqqa kilüe häm monıñ, üz çiratında, balalarnıñ yış xastalanuına kiterüe.

İldä bäbäylärgä söt urınına birelüçe tuqlanu rizıqları tıyılmıy, tik yaña qanın belän alarnı citeşterü häm satu tärtipkä salına.  

BMO 2016nçı yılda çığarğan xisabında bik küp däwlättä bäbäylär azığı häm şunıñ işe başqa êşlänmälärneñ marketingı belän bäyle bernindi xoquqıy normalarnıñ bulmawın citkerä. Anda, şulay uq, ana söte belän tuqlanğan balalarnıñ fizik häm aqıl yağınnan tağın da sälamäträk buluı assızıqlana. Oyışma xökümätlärne kükräk söte belän tuqlanunı yaqlap kiräkle qanunnarnı qabul itärgä çaqırdı.