İlbaşı zinnätle oçqıçın arendağa birä

Meksika däwlät başlığı Andres Manuêl’ Lopes Obrador, 4 yıl êlek saylanğannan soñ satuğa çığaruğa qaramastan, aluçı tabılmağan zinnätle ilbaşı oçqıçın tuğan könnäre häm tuy tantanalarında qullanu öçen arendağa biräçäklären belderde.  

Lopes Obrador qırıs êkonomiyä yaqlı säyäsätçe. Ul säfärlärendä däwlät oçqıçı urınına kommerśiyä reysların qullanunı östen kürä.

“İlbaşı oçqıçı çığımnarın häm qarap totu öçen totılğan aqçanı kire qaytaru öçen arendağa birelä,”-dide Meksika däwlät başlığı.

2018nçe yılnıñ iyülendä saylawda ciñgän Obrador “Boing Drimlayner 787-8” törendäge zinnätle oçqıçqa qarap: “İldä bu qadär fäqıyr’lek bulğanda, min moña utırırğa oyalam,”-dide. Ul xätta anıñ reklamasın da üze yasadı. “Böten dön’yağa möräcäğat’ itäm. Arzan bäyägä satıp alaçağığız bu uñaylı, zamança oçqıçnıñ restoranı häm yoqı bülmäse bar. Êçe irken. Mäs’älä barı bäyäse genä tügel. Şöhräte dä bar,”-dip söyläde Obrador.  

Oçqıçnı 2006nçı-2012nçe yıllar arasında ilbaşı wazıyfasında bulğan Felipe Kal’deron 218 million dollarğa satıp ala.  Tik qullanğan berdänber keşe - annan soñğı ilbaşı Ênrike Pen’ya N’yeto bula.