Zelenskiy Ärdoğanğa räxmäten belderde
Ukraina Däwlät başlığı Volodimir Zelenskiy çärşämbe könne telefonnan söyläşkän Törkiyä İlbaşı Räcäp Tayyip Ärdoğanğa yaqlawı öçen räxmäten belderde
Volodimir Zelenskiy, yaňa video yullamasında östenlekneň Ukraina däwläten saqlaw buluın iskärtep uzıp: "Söyläşülärdä minem prioritetlarım bik açıq. Suğışnıň betüe, iminlek garantiyaları, suverenlıq, cir bötenlegeneň qabat täêmin itelüe, ilebez öçen çın garantiyalär, ilebezneň real’ saqlanuı”, - dip äytte.
Rusiyä xärbilärenä dä möräcäğät itüçe Zelenskiy Ukrainadağı suğış qırında ülgänçe qoralların taşlarğa kiňäş itte.
Zelenskiy: "Qoralın taşlağan härber urıs ğaskäriye ber şansqa iyä bulaçaq. İsän qalu şansı. Ayıruça alarğa möräcäğät itäm. Bu suğışnıň qazanına ırğıtılğan xärbilärgä. Häm äle haman üzen saqlaw instiktı bulğan başqa urıs ğaskärilärenä. Qorallarığıznı taşlağız. Bu – suğış qırında, bezneň cirlärebezdä ülüdän tağın da yaxşıraq”, - dip belderde.
Rusiyä oçqıçlarınıň qamaw astındağı Mariupolda yözlägän keşe yäşerengän teatrğa maxsus räweştä köçle bomba ırğıtuına häm monıň näticäsendä binanıň cimerelüenä basım yasawçı Ukraina liderı: "Ülüçelär sanı älegä belenmi. Rusiyäneň xalqıbızğa, Mariupolıbızğa, Doneśk töbägebezgä yasağannarı arqasında minem yörägem özgälänä. Rusiyä watandaşları. Mariupol qamalışığıznıň İkençe Bötendönya suğışı waqıtındağı Leningrad blokadasınnan ayırması nindi?" – dide.
Sankśiyalarğa qaramastan Rusiyä iq’tisadınıň äle haman Ukrainada "suğış maşinası”n totarğa däwam itüen bilgeläp uzuçı Zelenskiy şuňa kürä Rusiyägä qarşı yaňa çikläw paketlarına ixtıyac buluına, dönyanıň nihayät Rusiyäneň terror däwlätenä äylänüen räsmi räweştä qabul itüeneň häm iň möhime Ukrainanıň tağın da kübräk yärdäm aluınıň zarurlığına basım yasadı.
Volodimir Zelenskiy Awrupa komissiyası başlığı Ursula von der Leyen belän ütkärgän söyläşü waqıtında Awrupa illärenä sıyınğan Ukraina watandaşlarına yärdäm kürsätelüe mäs’äläsendä kileşüen dä citkerde.
Zelenskiy ayıruça kön däwamında Ukrainanıň dusları Törkiyä İlbaşı Räcäp Tayyip Ärdoğan häm Kanada Baş ministrı Jastin Trudo belän söyläşüen, bu söyläşülär waqıtında ildä tınıçlıq öçen yaňa adımnar mäs’äläsendä urtaq fikergä kilülären häm üzlärenä yaqlawları öçen räxmät äytüen iskärtep uzdı.
Rusiyä xärbiläre 24nçe fevral’dä Ukrainağa höcüm başlatqan ide.
