Poyızd hälakätendä ülüçelär sanı 75kä citte

Kongo demokratik cömhüriyäteneñ Lualaba töbägendä yök poyızdı rel’slardan çığu näticäsendä hälaq buluçılarnıñ sanı 75kä citte. Waqıyğa şimbä könne bulğan ide. Ul waqıtta 60 keşeneñ ülüen xäbär ittelär.

İlbaşınıñ cämäğat’çelek belän êlemtä bülege räsmi Twitter akkauntında soñğı sannarnı citkerde. Anda yazılğança, yaralanuçılar da bik küp.

Kongo demokratik cömhüriyäte ilbaşı Feliks Çisekedi ğomere özelüçelärneñ yaqınnarınıñ qayğısın urtaqlaştı.

İldä yök poyızdlarına qaçaq yulçı alu tıyılğan. Şuña qaramastan, mondıy oçraqlar bulğalap tora.