Ukrainadağı suğışta yuğaltular

Rusiyä saqlanu ministrlığı Ukrainanıñ Xerson töbägendäge Radensk awılı tirälärendä ber xärbi bazanı kontrol’gä aluların citkerde.

Belderüdä bolay diyelä: “Ukraina ğaskärläre bazanı xärbi texnika häm qorallarnı qaldırıp tiz arada taşlap kitte”.

Ministrlıqnıñ süzçese İgor Konaşenkov isä Ukrainada 2 meñ 119 xärbi asqorma ob’yektınıñ yuqqa çığarıluın söyläde. “Bolar arasında 74 komanda häm êlemtä üzäge, 108 hawa saqlanu sisteması S-300, Buk M-1, Osa häm 68 radar stanśiyäse bar,”-dide ul.

Monnan tış, Konaşenkov 69 xärbi oçqıçnıñ cirdä, 21eneñ hawada yuq itelüen äytte. Ukraina yağınıñ barlığı 748 tank häm bronetexnikası, 76 küpköpşäle raketa atuçısı, 274 artilleriya häm minomyet snaryadı, 532 maxsus xärbi texnikası häm 59 keşesez hawa apparatı täêsirsez xälgä kiterelgän.

Ukraina ğomumştab idaräsennän yasalğan belderüdä isä qarşı yaqnıñ yuğaltuları citkerelä. Anda äytelgänçä, 24nçe fevral’dän 6nçı martqa qadär 11 meñnän artıq Rusiyä xärbiyeneñ ğomere özelde, 44 oçqıç, 48 boralaq, 285 tank, 985 bronetexnika, 109 artilleriya sisteması, 60 yağulıq tankerı häm 4 keşesez hawa apparatı yuq itelde.

Ukraina gaz tapşıru sisteması operatorı, höcümnär arqasında, Kiyev, Xar’kov, Mikolayev, Zaporoj’ye, Doneśk häm Lugansk şähärlärendä 16 tabiğıy gaz stanśiyäsen yabarğa mäcbür buluların belderde