AQŞnıñ höcüm farazı - Rusiyäneñ "śirk" cawabı
AQŞ Rusiyneñ Ukrainağa bärep kerü öçen yalğan säbäp uylap çığaraçağın farazlıy, Rusiyä monı śirkka oxşata
AQŞnıñ däwlät särqatibe Êntoni Blinken Rusiyäneñ Ukrainanı basıp alu öçen yalğan terrakt, ximik höcüm yäisä grajdanlılarğa keşesez hawa apparatı belän höcümne sıltaw itep kürsätä aluın belderde. Ul BMOnıñ İminlek şurasında yasağan çığışında Rusiyäneñ Ukrainağa qarata agressiyäseneñ tınıçlıq häm iminlekkä yanawın söyläde.
Blinken Rusiyäneñ höcümnän waz kiçmäwen, kiläse könnärdä moña äzerlänüen alğa sörä.
“Rusiyä höcüm öçen säbäplär planlaştıra. Ul Ukrainanı berär köç qullanu oçrağında ğayeplärgä mömkin. Bu Rusiyägä qarata yalğan terrakt bulırğa mömkin. Grajdanlılarğa hawa apparatı belän yasalma höcüm. Yalğan yäisä çın ximik höcüm bula ala. Rusiyä bolarnı êtnik çistartu yäki genośid bularaq bäyälärgä mömkin,”-dip söyläde Blinken.
Ul Rusiyäneñ Ukrainağa höcümendä raketa häm bombalar qullanu ixtimalın häm kiber höcümnär yasıy aluın da äytte. “Rusiyäneñ bilgelängän ukrainalı törkemnärne nişanğa alacağı turında mäğ’lümat bar,”-dide AQŞ däwlät särqatibe. Ul Rusiyäne tağın ber qat diplomatiyägä küçärgä çaqırdı.
Rusiyä tışqı êşlär ministrı urınbasarı Sergey Verşinin ileneñ Ukrainağa höcüm itü öçen sıltawlar uylap tabaçağı turındağı farazlarnı kire qaqtı. Ul Könbatış illäreneñ nigezsez ğayepläwlär belän BMO İminlek şurasın śirkka äwerelderüen, spekulyaśiyä belän şöğıl’länülären citkerde.
Bäyläneşle xäbärlär
Çilidä poyezd (поезд) qazası
Kön’yaq Amerika ile Çilidä yulçı poyezdı (пассажир поезды) yök poyezdı (йөк поезды) belän bäreleşkän