NATO Awrupanıñ könçığışındağı köçen arttıraçaqmı?
NATO illäreneñ saqlanu ministrları Rusiyä belän Könbatış arasında artqan kiyerenkelektän soñ Awrupanıñ könçığışı häm kön’yaq-könçığışında ittifaqnıñ xärbi kontinentın arttırunı söyläşü öçen cıyılaçaq
NATO saqlanu ministrları cıyılışı 16nçı-17nçe fevral’dä Bel’giya başqalası Bryussel’däge NATO ştabında uzaçaq. Ministrlarnıñ kön tärtibendä Rusiyäneñ Ukraina çigendä xärbi köçen arttıruı häm ittifaqnıñ şuşı säbäp belän artqan kiyerenkelekkä qarşı yasıy alaçaq ğamällär bar.
NATO Rusiyä belän kiyerenkelek artqannan soñ berniçä ay êçendä könçığıştağı Baltıyq buyı illäre Êstoniya, Latviya, Litva belän bergä Pol’şada hawa, diñgez häm ciröste kontinentın küätländerde.
İttifaqnıñ Baltıyq buyı illäre belän Pol’şada urnaşqan 4 xärbi berlektä wazıyfalı ğaskäri sanın berniçä atnada 4 meñnän 5 meñgä citkerelde.
Daniya, Niderland, İspaniya, Amerika Quşma Ştatları häm Angliya cibärgän xärbi köymälär häm xärbi oçqıçlar belän bu töbäktäge xärbi kontingent arttırıldı.
Ayıruça Rumıniyada häm Bolgariyada soñğı atnalarda NATO illäreneñ ğaskäriläre häm xärbi oçqıçları kübäytelde. Rumıniyada xäzerge waqıtta NATO illärenä äğ’za 2 meñnän kübräk ğaskäri urnaşqan.
NATO saqlanu ministrları cıyılışında barlıq xärbi törkemnärneñ citäkçelegeneñ NATO qaramağına alınuı mäs’äläsendä qararnıñ qabul itelüe kötelä.
NATOnıñ Könçığış Awrupadağı kontingentınıñ ozaq waqıtlı buluı planlaştırıla. Rumıniyada suğış berämlegeneñ urnaştırıluı küzdä totıla. Ayıruça kön’yaq-könçığış Awrupanıñ başqa urınnarında da xärbi berleklärne urnaştıru qararı bäyälänä.
