Djonson Putinnı kisätte

Angliyä xökümäte räise Boris Djonson Rusiyä däwlät başlığı Vladimir Putinnı Ukrainanı basıp alu mäs’äläsendä kisätte. Alar telefon aşa söyläşte.

Angliyä xökümäte räise kanśelyariyäsennän citkerelgänçä, Djonson äñgämä waqıtında Rusiyäneñ Ukraina çigendäge doşmança ğamälläre öçen tirän borçıluın belderä. Ul NATOnıñ açıq işek säyäsäte nigezendä barlıq Awrupa demokratiyäläreneñ ittifaq äğ’zası bulırğa teläk belderü xoquqına iyä ikänlegen iskärtep: “Bı xoquq tulısınça Ukrainağa da qağıla,”-dide.  

Djonson NATOnıñ saqlanu ittifağı buluın da xäterlätte.

Kreml’dän älege söyläşü turında yasalğan belderüdä isä mondıy yullar bar: “Ukrainadağı krizis häm Rusiyä federaśiyäseneñ iminlege öçen ozaq waqıtlı häm xoquqıy garantiyälär täêmin itü xosusında centekle fiker alışu buldı”.