Germaniyädä poliśiyä xezmätkärlären üterüdä şöbhälelär totqarlandı

Germaniyädä yul xäräkäten kontrol’ itüçe 2 poliśiyä xezmätkären atıp üterüdä şöbhälänep êzlängän 2 keşene qulğa aldılar.

Kayzerslautern iminlek idaräse nemeś matbuğatında çıqqan bu xaqtağı xäbärlärneñ döres buluın belderde. Tik şöbhälelärneñ başqa äşnäläre bulğanmı – wäqalätlelär monı äytmi.

Germaniyä mediasında şöbhälelärneñ berseneñ Andreas Yoxannes Şmitt isemle buluı citkerelä. İkençeseneñ kem ikäne älegä bilgele tügel.

Şöbhälelärneñ nemeś buluı açıqlanğannan soñ xalıqnıñ şok xäle tağın da arttı.

İsegezgä töşeräbez: Germaniyäneñ kön’yaq-könbatışındağı Kayzerslautern qalası tiräsendä düşämbe könne yul xäräkäten kontrol’ itüçe 2 poliśiyä xezmätkäre atıp üterelde. Alarnıñ berse xatın-qız.

Kayzerslautern poliśiyä idaräsennän belderelgänçä, waqıyğa cirle waqıt belän irtänge säğat’ 4 tulıp 20 minut tiräsendä bula.