"Ukraina belän Rusiya arasındağı suğış turında söyläşkändä bik saq bulırğa kiräk"
Bu xaqta Ukraina däwlät başlığı Vladimir Zelenskiy belderde
Ukraina däwlät başlığı Vladimir Zelenskiy Kiyevta matbuğat äğ’zalarınıň sorawlarına cawap birde.
Zelenskiy äytüençä, Rusiya belän suğış bulğan oçraqta, ber il dä üz armiyäsen Ukrainanı yaqlarğa cibärmäyäçäk.
“Qaysı ilneň armiyäse suğış bulsa, bezne yaqlarğa äzer? Mondıy närsä bulmayaçaq. Bu NATO öçen bik qurqınıç. Ukraina ittifaqqa kersä, NATO Ukrainanı saqlarğa tiyeş bulaçaq. Bolar NATO öçen bik citdi problemalar. Qayber Awrupa illäre Ukrainanı NATOğa kertmiçä qurqınıç almawğa ışanalar. Läkin xäzer suğış başlana ikän, ul qayber NATO illäreneň çiklärendä bulaçaq” dide ul.
Zelenskiy Könbatış illärendä Ukraina häm Rusiya arasındağı suğış mömkinlege turında panika atmosferası tudırılğanına basım yasap bolay dide: “Ukraina belän Rusiya arasındağı suğış turında söylägändä bik saq bulırğa kiräk. Angliya, Germaniya, Franśiya, Litva matbuğatı suğış bar kebek kürsätä. Läkin alay tügel. Bezgä bu panika kiräkmi”.
Vladimir Zelenskiy suğış bulıp bulmayaçağın tögäl genä äytep bulmawın iskärtep, “Suğış bulırğa mömkin. Ägär dä tulı masştablı suğış bulsa, ul Ukraina belän genä, bezneň däwlät cirlärendä genä bulmas. Ul mäğ’lümat häm kiber höcümnärne dä üz êçenä alğan gibrid suğış bulaçaq”dide.
Zelenskiy Ukrainanıň törle sśenariylarğa äzer buluın assızıqladı häm Rusiya däwlät başlığı Vladimir Putin belän teläsä nindi formatta oçraşırğa äzerlegen äytte.
