Qoş grippı tarala

Franśiyädä qoş grippı kizüe taraluın däwam itä. Awıl xucalığı ministrlığınnan belderülärençä, il külämendä 280 qoşçılıq fermasında çir kürelgän. Kizü başlanğan sentyabr’ ayınnan birle 2 million yarım qoşnı yuq itkännär. Bu sannar uzğan yılnıñ şul uq çorı belän çağıştırğanda azraq.

Ministrlıq ferma xucalarınıñ zararları tülänäçägen belderde. Anda kizüneñ qoş ite tarmağına yoğıntı yasamawı, Franśiyädä yäşäwçelärneñ qurıqmıyça qoş ite häm yomırqa aşıy aluı äytelde.

Awıl xucalığı ministrı Jul’yen Denormandi qoş grippına qarşı êffektiv vakśina tabu êşçänleklären tizlätü kiräklegen, kiläse atnalarda ike preparatnı sınaw başlanaçağın belderde.

Franśiyädä noyabr’ başında qoş grippı afäte turında kisätü yuğarı däräcägä citkerelde, kizüneñ taraluına yul quymaw öçen qoşçılıq fermaları karantinğa kertelde.

İldä uzğan yıl älege çir arqasında 3 million yarım qoş yuq itelde.

Yaponiyäneñ Çiba töbägendä dä ber fermada qoş grippı oçrağı terkälde. Däwlät kanalı NHKnıñ xäbärenä qarağanda, Sosa rayonında ber ürdäk töreneñ ülüennän soñ başqa ürdäklärne dä tikşerälär häm alarnıñ kübesendä yoğışlı awıru barlığı açıqlana. Şunnan soñ meñgä yaqın qoşnı yuq itälär.