İndoneziyanıñ başqalası üzgärä

İndoneziya xökümäte başqala statusın Yava utrawındağı Djakartadan ala. Borneodağı Könçığış Kalimantan töbägendä monıñ öçen yaña qala tözeläçäk - Nusantara.

Böyekbritaniyäneñ “Guardian” gazetı xäbärenä qarağanda, bu xaqta milli üseş planlaştıru ministrı Suxarso Monoarfa belderä. Ul däwlät başlığı Yoko Vidodonıñ “Nusantara” atamasın 80 isem arasınnan saylap aluın häm anıñ İndoneziya geografiyäsen çağıldıruın äytä. Nusantara – utrawlar tezmäse yäisä arxipelag mäğ’näsendä.

Parlamentta yaña başqala belän bäyle qanun proyektı qabul itelde. Nusantaranı tözüne bıyıl başlarğa uylıylar. Proyekt 2024nçe yılda – xökümät binaları yaña başqalağa küçengäç tögällänäçäk.

Xäzerge başqala Djakartada 10 million keşe yäşi. Qala yıl sayın buluçı tabiğıy afätlär, infrastruktura xilaflıqları häm cir astı suların çiktän tış küp qullanu arqasında tufraq ubıluı şikelle problemalar belän köräşä. Başqalanı küçerü niyäte dä älege awırlıqlar arqasında kilep tua.

Êkologlar bu küçenüneñ Könçığış Kalimantanda orangutang, qoyaş ayuları häm ozın borınlı maymıllar yäşi torğan urmannarğa zarar biräçägen häm tabiğat’ne pıçratuğa kiteräçägen äytep qarşı çığa.