N'yu-Yorkta yanğında ülüçelär belän xuşlaştılar
Bronks rayonında 9nçı ğıynvarda êlektrlı cılıtqıçtan çıqqan yanğında 17 keşeneñ ğomere özelde, alarnıñ 8e bala
Amerika Quşma Ştatlarınıñ N’yu-York şähäre Bronks rayonında ber yortta çıqqan yanğında ğomere özelgän 15 möselman öçen cenaza namazı qılındı.
Utnıñ qorbanı bulğan 17 keşeneñ 15e belän İslam mädäniyät üzägendä xuşlaştılar. Yanğında hälaq bulğan 2 balanı uzğan atna başında cirlägännär ide.
Cenaza cıyınında kübese Afrika däwläte Gambiyädän bulğan möselmannarnıñ yaqınnarı häm kürşe-tirädä yäşäwçelär qatnaştı.
Soñğı yulğa ozatuğa N’yu-York mêrı Êrik Adams, AQŞ senatınnan Çak Şumer häm Gambiya xökümätennän 2 wäqalätle dä kilde.
Cenaza namazı uqıp doğa qılğannan soñ 11 mäyetne cirläw öçen N’yu-Djersiğa cibärdelär, 4sen isä, ğailäläreneñ sorawı buyınça, Gambiyägä iltäçäklär.
İsegezgä töşeräbez, Bronks rayonında 9nçı ğıynvarda êlektrlı cılıtqıçtan çıqqan yanğında 17 keşeneñ ğomere özelde, alarnıñ 8e bala. Monnan tış, 63 keşe töten belän ağulandı.
