ŚRU yätim balalarda täcribä ütkärgän

Amerika Quşma Ştatları üzäk küzläw oyışması ŚRUnıñ Daniyada uzdırğan psixologik täcribälärdä yätim balalarnı qullanuı turında belderülär bar.

“Daniş Radio” äzerlägän dokumental’ tapşıruğa qarağanda, bu testlarda 311 daniyäle bala qatnaşqan.  İnterv’yu birüçelärneñ berse Per Vennik sabıy çağında üze belän täcribä ütkärelüen söyli. Aña êlektrodlar berketep urındıqqa utırtqannar häm yuğarı diapazonda tawışlar tıñlarğa mäcbür itkännär.

Êşçänlekneñ 1960nçı yıllarda başlanuı häm testlarnıñ Daniyä başqalası Kopengagennıñ Muniśipal’ xastaxanäse podvalında uzdırıluı belderelde.

Tapşıruda assızıqlanğança, täcribälär öçen balalardan röxsät alınmağan. Alarnı podvalğa alıp töşkändä “qızıq närsälär bulaçaq” dip ışandırğannar.

Täcribäneñ maqsatı - balalarnıñ psixopatik sıyfatların açıqlaw bula.  

Vennik bu testlar turında söylägändä bolay di: “Bik räxätsez itkän ide. Bu barı minem xikäyäm tügel, bik küp balanıñ xikäyäse”.

Milli arxivlardan kürengänçä, proyekt ŚRU öçen êşläwçe Keşe êkologiyäse fondınnan yärdäm aluçı AQŞ sälamätlek saqlaw xezmäte belän bergäläp finanslana.

Tikşerenü waqıtında häm annan soñ balalarğa testlarnıñ ni öçen ütkärelüe äytelmi. 1977nçe yılda isä Daniyä psixiatrı Find Şul’singer älege êşçänlek turında centekläp añlatqan dissertaśiyä yaza.