Dön'yadağı iñ yäş cömhüriyät

Barbados dön’yadağı iñ yäş’ cömhüriyät buldı. Karib diñgezendäge utraw-däwlät Angliyä patşabikäse Êlizabet İkençeneñ xakimiyätennän çıqtı häm başqala Bridjtaunda uzğan tantanada cömhüriyät iğ’lan itelde.

İlneñ bäysezlegeneñ 55 yıllığına turı kilüçe çarada yaña ilbaşı Sandra Mêyson tön urtasında ant itte.

Tantanağa Uêl’s prinśı, Angliyä patşa täxete varisı Çarl’z da qatnaştı. Şulay uq, tanılğan şäxeslärdän barbadoslı cırçı Riannanı da kürergä mömkin ide.

Tantanada maqtawlı qunaq bularaq çığış yasağan prinś Çarl’z Karib utrawında yäşäwçelär duçar bulğan “qotoçqıç qollıq yawızlıqları”n qabul itte. Ul, konstituśion status üzgärüenä qaramastan, ike däwlät arasında bäyläneşlärneñ däwam itüen xäterlätte.

Räsmi xakimiyät üzgärüen belderü öçen Böyekbritaniyä monarxiyäsenä soñğı tapqır sälam birelgännän soñ Patşalıq bayrağı töşerelde häm anıñ urınına cömhüriyät ilbaşı ştandartı kütärelde.

Sandra Mêyson 2020nçe yılnıñ 16nçı sentyabrendä Barbados ğomum gubernatorı bularaq belderü yasadı häm Angliyä patşabikäse Êlizabet İkençeneñ däwlät başlığı buluın tanunı tuqtatıp, 2021nçe yılda cömhüriyät iğ’lan itärgä teläwlären äytte.

Barbados 1966nçı yıldan birle faktta bäysez bulsa da barı 1996nçı yılnıñ 30nçı noyabrendä Angliyädän bäysezlegen iğ’lan itä. Şulay da patşabikä anda däwlät başlığı bulıp tora.

Barbadosta yaqınça 285 meñ keşe yäşi.Turizm häm finans mäydanındağı yañartular belän ul regiondağı iñ bay utrawlarnıñ bersenä äwerelde.  

Kariblardağı başqa Angliyä koloniyälärennän Gayana 1970nçe yılda, Trinidad häm Tobago – 1976da, ä Dominika 1978nçe yılda bäysezleklären iğ’lan itte.