Omikron zur tizlek belän tarala

Kovid-19nıñ Omikron variantı dön’ya buylap tarala başladı.

Kön’yaq Afrika cömhüriyätennän Niderlandqa kilgän yulçılar arasındağı 13 keşedä älege variantnıñ kürelüe belderelde. İlneñ sälamätlek saqlaw ministrı fikerençä, andıylar tağın da kübräk bulırğa mömkin.

Daniyanıñ sül institutı da Kön’yaq Afrikadan kilgän yulçılar arasındağı 2 keşedä Omikron variantınıñ raslanuın belderde.

İtaliyädä ul Mozambiktan kilgän 1 keşedä açıqlandı. Ul ike doza vakśina yasatqan bulğan häm xäle äybät. Yoqtıruçı häm ğailäsendägelär küzätü maqsatınnan karantinğa alındı.

Avstraliyäneñ Sidney şähärendä dä Kön’yaq Afrika cömhüriyätennän kilgän 2 yulçıda Omikron açıqlandı. Alar Katar hawa yulları belän Doxa arqılı ilgä kergän. Älege keşelärne izolyaśiyädä totalar. Alar vakśinaların tulısı belän yasatqan häm awırtunı simptomnarsız uzdıra.

Avstriyäneñ Tirol töbägendäge wäqalätlelär dä uzğan atnada Kön’yaq Afrikadan qaytqan beräwneñ yaña variant bilgelärenä iyä buluın häm Kovid-19 testı näticäläreneñ pozitiv çığuın citkerde. Tik monıñ döreslegen raslaw öçen kiläse könnärdä tağın da kübräk tikşerenü uzdırırğa uylıylar.

Angliyädä isä 2 Omikron variantı kürengännän soñ qayber çaralar kürelde. Vakśina qadatularına qaramastan, ilgä kilgän härkemneñ 2 könnän soñ PŚR testı yasatuı kiräk. Cämäğat’çelek  transportı häm kibet şikelle yabulı mäydannarda bitlek kiyü mäcbüriyäte qabat kertelde.  

Tön’yaq Kipr törek cömhüriyäte koronavirusnıñ Omikron variantı kürelgän Botsvana, Êsvatini, Lesoto, Mozambik, Namibiya, Kön’yaq Afrika häm Zimbabvedan kerülärgä çikläw quydı.  

Gruziyä älege 8 Afrika däwlätennän kilüçelärgä 14 kön karantin şartı kertte. İzrail üzenä çit il keşeläreneñ kerüen tıydı.

Paqıstanda 6 Afrika däwläte häm Qıtaynıñ Gonkong avtonom töbägenä säyäxät çikläwe başlandı.

Atlantik okean yarındağı Angola da, Omikron variantı säbäple, 1nçe dekabr’dän başlap Kön’yaq Afrika cömhüriyäte, Botsvana, Êsvatini, Malavi, Mozambik, Namibiya häm Zimbabve belän çiklärne yabu qararı çığaruın xäbär itte.