Belarus' çigendäge migrantlar çirli başladı

Belarus’ belän Pol’şa çigendä Awrupağa kitüne kötep toruçı migrantlarnıñ sälamätleklärendäge problemalar kön uzğan sayın arta. Belarus’nıñ Grodno şähärendäge Bruzgi çik buyı töbägendä ber logistika üzägendä 2 meñ keşe 2 atna buyı yabulı mäydanda yäşi. Alarnıñ kübese Ğıyraq häm Süriyädän. Üzäktä şartlar naçaraya bara.

Belarus’ xalqı, ilneñ ğadättän tış xällär, êçke êşlär ministrlıqları, çik buyı komitetı häm armiyä migrantlarğa yärdäm itü öçen mobilizaśiyälände. Şulay da, çik buyında kötüçelärneñ sälamätlek problemaları arta häm ixtiyacları kübäyä. Mäydanğa Bötendön’ya sälamätlek saqlaw oyışması kilep tikşerenülär ütkärde. Alarnı Belarus’ ilbaşı kiñäşçese Yuriy Karayev ozatıp yörde. Ul belgeçlärgä mäğ’lümat birep, çiktä kötüçelärgä 24 säğat’ mediśina xezmäte kürsätelüen, xäzergä qadär 100 keşeneñ üpkäse yalqınsınıp, başqa sulış yulı awıruları häm diabet säbäple xastaxanägä yatqırıluın söyläde.

“Çiktä kötüçelär, başlıça, yötkerü, grip şikayät’läre, kükräge häm êçe awırtıp sälamätlek saqlawçılarğa möräcäğat’ itä. Balalar häm awırlı xatın-qızlar isä, kiräksä, xastaxanädä däwalawğa alına,”-di Yuriy Karayev.

Bötendön’ya sälamätlek saqlaw oyışması Awrupa regionı ofisı ğadättän tış xällär mödire Djeral’d Rokenşaub Belarus’ belän Pol’şa çigendäge wäzğıyät’neñ awır buluın assızıqladı. “Çiktä kötüçelärneñ sawlıqları naçar. Qayberläreneñ xronik çirläre bar. Belarus’ xökümäte bu problemanı çişärgä tırışa,”-dide ul.

Rokenşaub çiktäge migrantlarnıñ kübeseneñ illärenä kire qaytırğa telämäwen belderde. Ul darular, xalıqara mediśina yärdäme paketları häm gigiyena tovarları cibäräçäklärenä süz birde.

Başta çik buyındağı urmanda, annarı yabulı mäydanda yäşäwçe 2 meñ keşe inde 2 atnadan artıq yuına almıy. Qayberäwlär çäçlären yuıp bulsa da çistarınırğa tırışa. Kübese isä yärdäm oyışmaları kitergän dımlı salfetkalar belän gigiyena ixtiyacların qanäğat’länderä.