AQŞta xalıq qurqudan qoral satıp ala

Amerika Quşma Ştatlarında soñğı yıllarda afrikalı, aziyalı häm latinamerikalılarnıñ qoral satıp alularında sizelerlek üseş kürende. ABC kanalı monıñ belän bäyle xisap çığardı. Anda AQŞta yäşäwçe başqa kontinent keşeläreneñ üzlären ildä qurqınıçsız xis itmäwläre öçen qoral satıp alunı arttıruları turında äytelä.  

Milli atu sportı fondı, 2019nçı yıl belän 2020ne çağıştırğanda, afroamerikalılarnıñ utlı qoral satıp alunı 58,2%qa, aziyalılarnıñ - 43%qa, latinamerikalılarnıñ isä 49%qa arttıruın citkerde. Şunısın da östäw urınlı: tulayım kliyentlarnıñ  40%ı täwge tapqır qoral iyäse bula.

Federal’ tikşerenü byurosı (FBİ) mäğ’lümatlarına qarağanda, AQŞta soñğı 10 yılda näfrätkä nigezlänğän cinayät’lärneñ iñ kübe 2020nçe yılğa qarıy. Qara tänlelärgä qarata näfrät yözennän êşlängännäre bıltır 40%qa arta.

FBInıñ näfrät nigezendäge cinayät’lär statistikasına qarağanda, 2020nçe yılda AQŞta Afrikalılar iñ küp rasaçıl höcümgä duçar qalğan törkem bula. Barlığı 2 meñ 755 oçraq turında xäbär itelgän. Aziya cämäğat’çelegen nişanğa alğan näfrät cinayät’läre bıltır, annan aldağı yıl belän çağıştırğanda, yaqınça 73%qa artqan.

Älege êtnik törkemnärneñ qoral satıp alu säbäpläreneñ başında “qurqu”  häm “üz-üzeñne yaqlaw” faktorı tora.

Amerika Quşma Ştatlarınıñ awırularnı kontrol’dä totu häm kisätü üzäge citkergänçä, AQŞtağı här 10 ülemneñ 6sı utlı qoraldan atu belän bäyle. Här könne yaqınça 109 keşe şul räweşçä yaralanıp hälaq bulğan.