Merkel' wazıyfasında qalaçaq

Germaniyä ilbaşı Frank Val’ter Ştaynmayer kanśler Angela Merkel’dan yaña xökümät tözelgängä qadär wazıyfasın däwam itüen soradı.

26nçı sentyabr’däge saylawlardan soñ parlamentta uzğan berençe utırış tögällängäç Merkel’ ham başqa xökümät äğ’zalarına wäqalätläre räsmi räweştä tögällänüe belderelde. Staynmayer andağı çığışında Merkel’gä 16 yıllıq xezmäte öçen räxmät äytte.

“Xörmätle kanśler, ilebezdä krizislar häm bolğanışlarğa bik yarlı bulmağan çorda citäkçelek itkän 16 yıl öçen sezgä räxmät äytergä tiyeşbez. Yıllar buyı zur krizislar buldı: xezmätegezneñ başındağı finans häm iq’tisadi krizis, ikençe çordağı yevro krizisı häm öçençe çordağı zur möhacir häm migraśiya krizisı häm soñğısı - Kovid-19 krizisı. Bu yıllarda ilebez Awrupada häm dön’yada xörmät häm söyügä ireşte,”-dide Germaniyä ilbaşı. Ul 2015nçe yılda sıyınuçı krizisı çorında birgän qıyu qararı öçen Merkel’ne maqtadı.

“Tik härnärsädän alda watandaşlarıbıznıñ ışanıçın yawlawğa ireştegez. Süriyädän kilgän möhacirlär bezgä sıyınğan çorda barı üz ilegez öçen tügel, Awrupa öçen dä cawaplılıq alırlıq qıyulığığız öçen şäxsän räxmätemne belderäm,”-dip däwam itte Ştaynmayer.

Germaniyädä saylawlardan soñ federal’ parlament cıyılışında xökümät räise häm başqa ministrlarnıñ wäqalätläre tögällängän sanala. Tik ilbaşı, konstituśiyä nigezendä, ildä yaña xökümät tözelgängä qadär êlekkegeseneñ wazıyfa başqaruın kiñäş itä.