AQŞ Äfğanstannan çığıp bette

AQŞnıñ üzäk köçlär komandirı Kennet Makkenzi Amerika ğaskärläreneñ Äfğanstannan çığu prośessı tögällänüen belderde. Ul älege ildäge 20 yıllıq missiyälärenä noqta quyıluın citkerü öçen Pentagon süzçese Djon Kirbi belän kameralar qarşısına çıqtı.  

Makkenzi bolay dip söyläde: “Amerika watandaşların häm yaqlawçısız äfğannarnı êvakuaśiyäläw êşçänlegeneñ axırında Äfğanstannan çığuıbıznıñ tögällänüen xäbär itärgä telim. Soñğı C-17 oçqıçı 30nçı avgustta AQŞnıñ Könçığış yarı waqıtı belän 15 säğat’ 29 minutta Qabulnıñ Xamid Karzai xalıqara aêroportınnan kütärelde”.

Qorallı köçlär wäqalätlese Äfğanstandağı barlıq êşçänlekläreneñ tögällänüen äytte. Ul älege ildäge 20 yıllıq xärbi tıqşınuları xaqında: “Bu wazıyfa arzanğa töşmäde. Uzğan atnada DEAŞ höcümendä ülgän 13 ğaskärine dä kertep tulayım 2 meñ 461 Amerika xärbiye ülde häm 20 meñnän artığı yaralandı,”-dide.

Kennet Makkenzinıñ Äfğanstannan çığu tögällänüen belderüennän soñ AQŞ ilbaşı Djo Bayden yazma açıqlaw yasadı. “Xäzerge waqıtta Äfğanstandağı 20 yıllıq xärbi missiyäbez bette” dide ul.

Bu kileşü 2020nçe yılnıñ 29nçı fevralendä Katar başqalası Doxada AQŞ idaräse belän Taliban arasında tözelgän ide. Ul Amerika ğaskärläreneñ 2021nçe yılnıñ 1nçe mayınnan Äfğanstannan çığa başlawın küzallıy.

Ämma 2021nçe yılnıñ 20nçe ğıynvarında AQŞ ilbaşı wazıyfasına kereşkän Djo Bayden çığunıñ 1nçe mayğa citeşä almayaçağın belderde. Soñraq ul 11nçe sentyabr’gä qadär çığaçaqların äytte.