Qabuldağı şartlawlarnı DEAŞ oyıştırdı

Äfğanstannıñ başqalası Qabulda kiçä kiçke säğat’lärdä bulğan 3 şartlawda 90 keşeneñ ğomere özelde. Höcümnär öçen cawaplılıqnı DEAŞ terrorçı oyışması üz östenä aldı.

3nçe şartlaw Xamid Karzai aêroportı yänäşäsendä bombalı höcümnärdä ğomere özelüçelär häm yaralılar iltelgän xastaxanä yanında bula.

BBCneñ yuğarı wäqalätle ber mediśina xezmätkäre süzlärenä tayanuçı xäbärendä, berençel mäğ’lümatlarğa qarağanda, 60 keşeneñ ülüe, 140ınıñ yaralanuı belderelä.

Xamid Karzai xalıqara aêroportı urnaşqan cirlektä bulğan şartlawlarda ülüçe Amerika xärbiläreneñ sanı isä 12gä citte. AQŞ saqlanu ministrlığı 15 ğaskärineñ yaralanuın belderde.

Qabul şähärendä kön buyı 6 ayırım şartlaw buldı.

AQŞ ilbaşı Djo Bayden Äfğanstandağı wäqalätlelär dä videoêlemtä aşa qatnaşqan cıyılıştan soñ yasağan berençe açıqlawda bolay dide: “Bu höcümne DEAŞnıñ Xorasan törkeme yasawın uylıybız. Monı êşläwçelärgä şunı äytäm: onıtmayaçaqbız, ğafu itmäyäçäjkbez, cawabın birderäçäkbez”.

AQŞ üzäk quätlär komandirı Kennet Makkenzi isä DEAŞ höcümnäreneñ däwam itäçägen kötülären belderde.