Yupiternıñ iyärçenendä su parları tabıldı
Qoyaştan millionnarça çaqrım yıraqlıqtağı iyärçenneñ okeannarı yaqınça 148 gradus suıq hawa şartları säbäple bozlanıp qatqan xäldä
Yupiternıñ iñ zur iyärçene Ganimednıñ atmosferasında täwge tapqır su parları tabıldı.
AQŞnıñ aviaśiya häm ğaläm agentlığı NASA Xabbl teleskobı belän uzdırılğan tikşerenü näticälären urtaqlaştı. Ğalimnärneñ 1998nçe, 2010nçı häm 2018nçe yılğı küzätülären çağıştırğannan soñ Ganimed atmosferasında su parları êzläre açıqlana. Alar iyärçen töşke säğat’lärdä êkvator yänäşäsendä bulğanda bozdan toruçı öslekneñ qatı xalättän gazğa äwerelüe waqıtında barlıqqa kilä.
Qoyaştan millionnarça çaqrım yıraqlıqtağı iyärçenneñ okeannarı yaqınça 148 gradus suıq hawa şartları säbäple bozlanıp qatqan xäldä.
Şul uq waqıtta, 2018nçe yılda Ganimedta kislorod atomı tabılmawına da iğ’tibar cälep itelä.
Yupiternıñ orbitasında barlığı 79 iyärçen bar. İñ külämlese -Ganimed. Ul, şul uq waqıtta, Qoyaş sistemasındağı 9nçı zur cisem. Xätta Merkuriydan da zurraq. Monnan tış, ul Qoyaş Sistemasında üz magnit qırı bulğan berdänber iyärçen.
NASAnıñ 2011nçe yılda ğalämgä oçırğan Juno yasalma iyärçene 2016nçı yılnıñ iyülendä Yupiterğa barıp citte häm älegä qadär anda êşçänlek alıp bara.
Bäyläneşle xäbärlär
Putin Ciñü könendä çığış yasadı
Bügen Rusiyädä İkençe Bötendön’ya suğışınıñ tögällänüen bilgeläp uzalar
