Ärmänstanda Paşin’yannıñ partiyäse alda bara

Ärmänstanda uzğan irtä parlament saylawlarında, räsmi bulmağan berençe näticälärgä qarağanda, Nikol’ Paşin’yannıñ partiyäse ciñde. İlneñ üzäk saylaw komissiyäse beldergänçä, tawış birüdä qatnaşu 49,4% täşkil itkän.

Berençel räsmi bulmağan näticälärgä qarağanda, wazıyfasınnan kitkännän soñ da waqıtlıça xökümät räise känäfiyendä qalğan Paşin’yannıñ “Grajdanlı kileşü partiyäse” tawışlarnıñ 53,92%ın alıp berençelektä bara. Êlekkege ilbaşı Robert Koçaryan liderlığındağı “Ärmänstan ittifağı” isä älegä 21,1% tawışqa iyä buldı. Alar yazmaça belderüdä saylaw näticälären tanımayaçaqların citkerde.

“Oppoziśiyäneñ küp keşe cıyğan mitingları häm xakimiyättäge partiyäneñ çaralarında bik az qatnaşuçı buluı tulısınça başqa närsäne kürsätä. Saylaw uçastoklarınnan oyışqan häm planlaştırılğan xäyläkärleklär xaqında söyläwçe yözlärçä xäbär isä ışanıç citmäwneñ töp kürsätkeçe,”-diyelä belderüdä.