Konvert êçendä - qanlı pıçaq

İspaniyada säyäsätçelär soñğı waqıtlarda ülem belän yanawlarğa duçar buldı. Monıñ 4nçe mayda Madrid avtonom töbägendä uzaçaq cirle parlament saylawları belän bäyläneşe buluı uylanıla. Yanaw êçtälekle xatlar sul koaliśiyä xökümäte äğ’zalarına kilä.

23nçe aprel’dä şundıy yullamalarnı êçke êşlär ministrı Fernando Grande Marlaska, jandarmeriyä ğomum komandirı Maria Gamez häm çiktän tış sulçı “Unidas Podemos” firqaseneñ liderı Pablo İglesias alğan ide. Yanaw xatı xäzer sänäğat’, säwdä häm turizm ministrı Reyes Marotoğa da kilgän. Ul konvert tışına cibärüçeneñ adresı da yazılğan buluın, êçennän qanlı pıçaq çığuın belderde. Maroto xat turında iminlek köçlärenä xäbär itkän häm şiqayät’ beldergän. İspaniyä ministrı Twitter aşa yasağan belderüendä “Yanaw häm köç qullanu demokratiyäneñ tawışın berqayçan da tıya almas” di.

Poliśiyä konvertnı cibärüdä şöbhälänelüçe ber keşeneñ totıqlanuın häm annan soraw alınuın xäbär itte.