Süriyädä 12 meñ bala ülde yäisä ğarip qaldı

Süriyädä 10 yıl däwam itüçe suğışta yaqınça 12 meñ bala ülde yäisä yaralandı. BMOnıñ balalarğa yärdäm fondı qurqınıç sannar belän urtaqlaştı. Oyışmadan yasalğan belderüdä Süriyädäge sabıylarnıñ 90%ınıñ gumanitar yärdämgä moxtac buluı äytelä.

İldä 5 yäş’tän keçe yartı millionnan artıq narasıy xronik açlıq arqasında üsüdä artta qala häm şunlıqtan buyları bik qısqa. Süriyäneñ üzendä 2 million 400 meñ, çittä isä 750 meñ bala mäktäptä uqımıy.   

UNİCEF mäğ’lümatlarına qarağanda ildä 2011nçe yıldan 2020nçegä qadär yaqınça 12 meñ bala hälaq buldı yäisä ğomerlek invalid qaldı. 5 meñ 700dän artıq sabıy bäreleşlärdä qullanıldı. Aralarında 7 yäş’leklär dä bar.

Daimi räweştä köç qullanu, şok häm travmağa duçar buluları arqasında psixologik problemalı balalarnıñ sanı uzğan yıl ike tapqır artqan. Süriyädä 10 yıl buyı 1300dän artıq mäktäp häm xastaxanä höcümgä duçar buldı.