Qazadan soñ 36 kön Amazon urmannarında yäşägän

Braziliyädäge Amazon urmannarına yığılıp töşüçe oçqıçtan soñğı mizgeldä sikerep qotılğan pilot Antonio Sena 36 kön buyı yäşäw öçen köräşä. Ul üsemleklär häm qoş yomırqaları belän tuqlanıp isän qaluın söyli.

Cessna 210 törendäge keçkenä oçqıç ğıynvar ayında qaza kiçerä. Anıñ motorı bozıla häm Amazon urmannarına kilep töşep yana başlıy. Oçqıçnıñ radardan yuqqa çığuın kürgän wäqalätlelär här cirdä Senanı êzli başlıy. Ber atna däwam itkän êzläw-qotqaru êşçänlege barışında pilotnı da, oçqıçnıñ cimereklären dä taba almıylar. Şulay itep, Antonio Senadan ömetläre özelä. Êzläw tuqtatıla.

Pilot isä qoş yomırqaları häm üsemleklär belän tuqlanıp 36 kön urmanda yäşägännän soñ kötelmägändä kaştan cıyuçı törkem belän oçraşa häm, şulay itep, qotqarıla.

Antonio Sena cirle mediağa interv’yusında: “Yäşäw öçen miña köç birgän berdänber närsä – ğailämne yaratu ide,”-di.